Հրազդանի բազմաբնակարան շենքերի վերելակները կնորոգվեն։ Այդ մասին ֆեյսբուքյան իր էջում տեղեկացրել է Կոտայքի մարզպետ Ռոմանոս Պետրոսյանը։

Վերելակների ֆոնդի թարմացման և նորոգման ծրագրի արժեքն է 96,424,300 դրամ, որից 50%-ը պետության ֆինանսավորումն է, մնացած մասը՝ համայնքի ներդրումը:

«2020թ-ի սուբվենցիաների տրամադրման նպատակով կառավարությունում ստեղծված միջգերատեսչական հանձնաժողովի նիստում Կոտայքի մարզից քննարկմանը ներկայացված և արդեն հավանության արժանացած ծրագրով Հրազդան քաղաքում նախատեսված է բազմաբնակարան շենքերի վերելակների նորոգում:

Քաղաքի վերելակների կեսից ավելին արդեն սպառել են իրենց ռեսուրսները, որոշներն էլ կորցրել են անվտանգությունն ապահովող մասերը, այդ իսկ պատճառով այս ծրագրի որակյալ և ժամանակին իրականացումը առաջնահերթ լուծում պահանջող խնդիր է»,-ասվում է գրառման մեջ: