Ադրբեջանցի հաքերները կորոնավիրուսով մոտ 1000 հայաստանցի վարակակրի տվյալներ են հրապարակել։ Այդ մասին ֆեյսբուքյան իր էջում տեղեկացրել է ՏՏ անվտանգության փորձագետ Սամվել Մարտիրոսյանը:

«Ադրբեջանցի հաքերները 2 ֆայլով հրապարակել են կորոնավիրուսով վարակակիրների անձնական նոր տվյալներ՝ անուններ, հասցեներ և բջջային հեռախոսները։ Այս անգամ անձնագրային տվյալներ չկան։ Մոտ հազար հոգու տվյալ կա»,- ասվում է գրառման մեջ:

Փորձագետը հավելել է, որ նախորդ արտահոսքին ավելացնելու բան չունի, նույն հաքերներն են։

«Ենթադրում եմ՝ նույն ձևով են տվյալները ստացել․ մարդիկ մեյլերով տվյալները իրար են ուղարկում, մեյլերը կոտրում են, տվյալները ստանում։ Վուալյա, ինչպես ասում էր Հեյդար Ալիևը՝ փախնելով Կուբատլիից», - գրել է նա: